واٹس ایپ صارفین کے لیے اہم سہولت،نہایت اہم نیا فیچر متعارف

واٹس ایپ نے صارفین کے لیے ایک ایسا نیا فیچر آزمانا شروع کردیا ہے جو بظاہر معمولی دکھائی دیتا ہے، تاہم روزمرہ استعمال میں اسے نہایت مفید قرار دیا جا رہا ہے۔

رپورٹ کے مطابق میٹا کی زیر ملکیت پیغام رسانی ایپ کے اینڈرائیڈ آلات کے نئے آزمائشی ورژن میں نئے نوٹیفکیشن ببلز کی جانچ کی جا رہی ہے۔

اس سہولت کے تحت کسی فرد یا گروپ چیٹ کا پیغام موصول ہونے پر اس کا فلوٹنگ ببل اسکرین پر ظاہر ہوگا، چاہے صارف ہوم اسکرین پر موجود ہو یا کسی دوسری ایپ استعمال کر رہا ہو۔

اس ببل میں رابطہ نمبر یا گروپ کی تصویر کے ساتھ واٹس ایپ کا چھوٹا نشان بھی نظر آئے گا، جو نئے پیغام کی اطلاع دے گا۔

صارف اس فلوٹنگ ببل پر کلک کرکے چیٹ کھول سکے گا، پیغام پڑھ سکے گا اور جواب بھی دے سکے گا، جبکہ واٹس ایپ کو مکمل طور پر کھولنے کی ضرورت نہیں ہوگی۔

اس فیچر سے فوری جواب، آسان ملٹی ٹاسکنگ اور ایک وقت میں متعدد چیٹس سنبھالنے میں مدد ملے گی۔

فی الحال یہ سہولت آزمائشی مرحلے میں ہے، اس لیے ابھی یہ واضح نہیں کہ اسے تمام صارفین کے لیے کب جاری کیا جائے گا۔