واٹس ایپ میں میٹا اے آئی کو نیوی گیشن بار کا حصہ بنانے پر کام شروع

مقبول ترین انسٹنٹ میسجنگ ایپلی کیشن واٹس ایپ نے اپنے اینڈرائیڈ صارفین کے لیے ایپ کے مکمل ری ڈیزائن پر کام کا آغاز کر دیا ہے، جس کے تحت نیویگیشن بار میں اہم تبدیلیاں متوقع ہیں۔ ٹیکنالوجی کی دنیا کی خبروں پر گہری نظر رکھنے والی معروف ویب سائٹ WABetaInfo کی رپورٹ کے مطابق، نئے ڈیزائن میں ایپ کے نیوی گیشن بار کو خصوصی طور پر تبدیل کیا جا رہا ہے تاکہ اسے مزید جدید اور دلکش بنایا جا سکے۔رپوٹ میں بتایا گیا ہے کہ اس نئے ڈیزائن میں نیویگیشن بار کو زیادہ شفاف (ٹرانسپیرنٹ) رکھا جائے گا، جس کے بعد اینڈرائیڈ ایپ کا انٹرفیس کافی حد تک آئی فون کی آئی او ایس ایپ سے مشابہ نظر آئے گا۔ اس کے علاوہ، واٹس ایپ کے اس نئے ڈیزائن میں مصنوعی ذہانت کے فیچر ’میٹا اے آئی‘ (Meta AI) کو بھی نیویگیشن بار کا براہِ راست حصہ بنانے پر کام جاری ہے۔ اس وقت عام طور پر کمپوز بٹن کے اوپر میٹا اے آئی کا شارٹ کٹ موجود ہوتا ہے، تاہم نئے ڈیزائن کے تحت نیچے دیے گئے نیویگیشن بار میں ہی اس کے لیے ایک الگ اور نمایاں جگہ شامل کیے جانے کا امکان ہے۔اس تبدیلی کے علاوہ، واٹس ایپ کی جانب سے ایک اور دلچسپ فیچر پر بھی کام کیا جا رہا ہے جس کے تحت صارفین کو ان کے دوستوں اور کانٹیکٹس کی سالگرہ کی بروقت یاد دہانی کرائی جاسکے گی۔WABetaInfo کے مطابق، یہ نیا اور جدید ڈیزائن فی الحال تیاری کے ابتدائی مراحل میں ہے اور اسے ایک بیٹا ورژن میں محدود صارفین کے لیے دیکھا گیا ہے۔ یہی وجہ ہے کہ اس نئے ڈیزائن اور دیگر فیچرز کو تمام عام صارفین کے لیے باضابطہ طور پر جاری ہونے میں چند ہفتوں سے لے کر کئی ماہ تک کا وقت لگ سکتا ہے۔