واٹس ایپ نے صارفین کیلئے نیا اے آئی ٹول متعارف کرا دیا

کیلیفورنیا: دنیا کی مقبول ترین میسجنگ ایپلی کیشن واٹس ایپ نے اپنے صارفین کے لیے ایک انقلابی آرٹیفیشل انٹیلیجنس (AI) ٹول “رائٹنگ ہیلپ” متعارف کرانے کا اعلان کیا ہے۔ میٹا کی جانب سے 26 مارچ کو پیش کیا گیا یہ فیچر مصنوعی ذہانت کی مدد سے صارفین کی گفتگو کے سیاق و سباق (Context) کو پڑھے گا اور اس کے مطابق موزوں جواب کا ڈرافٹ تیار کر سکے گا۔

میٹا کے آفیشل بلاگ پوسٹ کے مطابق، یہ نیا فیچر صارفین کو طویل پیغامات لکھنے کی زحمت سے بچائے گا۔ رائٹنگ ہیلپ نہ صرف جواب تجویز کرے گا بلکہ صارفین کی چیٹس کی پرائیویسی کو برقرار رکھتے ہوئے میسجز کو ڈرافٹ کرنے میں مدد دے گا۔ اس فیچر کا مقصد صارفین کے لیے گفتگو کو مزید تیز اور مؤثر بنانا ہے۔

اس اہم پیش رفت کے بعد واٹس ایپ اب ایپل (Apple) اور گوگل (Google) جیسی بڑی کمپنیوں کی صف میں شامل ہو گیا ہے، جو پہلے ہی اپنے پلیٹ فارمز پر اے آئی سے تیار کردہ جوابات (AI-generated replies) کی سہولت فراہم کر رہی ہیں۔ یہ ٹول خاص طور پر ان صارفین کے لیے مفید ثابت ہوگا جو دفتری یا پیشہ ورانہ مصروفیات کے باعث فوری اور معیاری جوابات دینا چاہتے ہیں۔