’ڈنگروں کی طرح کھانے‘ والے بیان پر تنقید، وسیم اکرم کا ردعمل آگیا

پاکستان کے سابق لیجنڈری کرکٹر وسیم اکرم کی جانب سے نئے سال پر دیے گئے ایک بیان نے سوشل میڈیا پر خاصی بحث چھیڑ دی، جس میں انہوں نے پاکستانیوں کو مشورہ دیا تھا کہ وہ “ڈنگروں کی طرح کھانا چھوڑ دیں” اور غیر ضروری و بے تحاشا کھانے کے نقصانات سے آگاہ کیا تھا۔

یہ ویڈیو سامنے آنے کے بعد وسیم اکرم کو شدید تنقید کا سامنا کرنا پڑا، جس میں صارفین نے انہیں پاکستانی عوام کو “ڈنگر” کہنے پر آڑے ہاتھوں لیا۔ سوشل میڈیا پر مختلف حلقوں کی جانب سے سخت ردعمل کے بعد اب وسیم اکرم کی ایک اور ویڈیو وائرل ہو گئی ہے، جس میں انہوں نے اپنے الفاظ پر وضاحت اور معذرت کی ہے۔

وضاحتی ویڈیو میں وسیم اکرم نے کہا کہ اگر ان کے الفاظ سے کسی کو دکھ پہنچا ہے تو وہ اس پر معذرت خواہ ہیں، تاہم انہوں نے اس بات پر افسوس کا اظہار کیا کہ لوگ اصل پیغام کے بجائے الفاظ کو پکڑ لیتے ہیں۔ ان کا کہنا تھا کہ لوگ خامیاں نکالنے میں ماہر ہیں لیکن صحت مند زندگی کے پیغام پر توجہ نہیں دیتے۔

سوئنگ کے سلطان نے اپنے بیان کا ایک مختلف انداز میں اعادہ کرتے ہوئے کہا کہ ان کا مقصد صرف یہ تھا کہ لوگ اپنی صحت کا خیال رکھیں اور غیر ضروری کھانے سے پرہیز کریں۔ وسیم اکرم نے یہ بھی کہا کہ “سچی بات اکثر کڑوی لگتی ہے”، تاہم نیت اصلاح کی ہوتی ہے۔

آخر میں انہوں نے دعا کی کہ اللہ سب کو ہدایت دے اور صحت مند طرزِ زندگی اپنانے کی توفیق عطا فرمائے