روس مزید 30 ہزار شمالی کوریائی فوجیوں کی تعیناتی کی تیاری کر رہا ہے: زیلنسکی کا دعویٰ

یوکرین کے صدر ولادمیر زیلنسکی نے دعویٰ کیا ہے کہ روس، یوکرین کے خلاف جاری جنگ میں مزید 30 ہزار شمالی کوریائی فوجیوں کو شامل کرنے کی تیاری کر رہا ہے۔ سماجی رابطے کی ویب سائٹ “ایکس” پر جاری بیان میں زیلنسکی نے کہا کہ روس گزشتہ ماہ سے اپنے جنوب مغربی سرحدی علاقے وورونز میں شمالی کوریائی فوجیوں کی آمد اور تعیناتی کے لیے انتظامات میں مصروف ہے۔ انہوں نے مزید بتایا کہ شمالی کوریا روس کو بیلسٹک میزائلوں کے اضافی لانچرز بھی فراہم کرنے کا منصوبہ بنا رہا ہے۔ صدر زیلنسکی نے خبردار کیا کہ یہ پیش رفت نہ صرف یوکرین بلکہ عالمی سلامتی کے لیے شدید خطرہ ہے کیونکہ روس شمالی کوریا کو حقیقی جنگی تجربہ حاصل کرنے اور اپنے ہتھیاروں کو بہتر بنانے میں مدد فراہم کر رہا ہے۔