پولیس یونیفارم میں ویڈیو شوٹ: صبا قمر کے خلاف مقدمے کی درخواست

پاکستان کی معروف اداکارہ صبا قمر پولیس کی وردی پہن کر ویڈیو شوٹ کروانے کے باعث قانونی مشکل میں پھنس گئی ہیں۔ پولیس یونیفارم کے مبینہ غلط استعمال پر ان کے خلاف مقدمہ درج کرنے کی درخواست دائر کر دی گئی ہے۔

اطلاعات کے مطابق ایڈیشنل سیشن جج الیاس ریحان نے صبا قمر کے خلاف دائر درخواست پر سماعت کی۔ درخواست گزار وسیم زوار نے مؤقف اختیار کیا کہ سوشل میڈیا پر موجود ایک ویڈیو میں صبا قمر کو ڈریسنگ روم میں پولیس یونیفارم پہنے دیکھا جا سکتا ہے، جبکہ انہوں نے ایس پی کا بیج بھی لگایا ہوا ہے۔

درخواست میں کہا گیا کہ قانون کے مطابق پولیس یونیفارم پہننے سے قبل متعلقہ محکمے سے این او سی لینا ضروری ہوتا ہے، جو اس معاملے میں حاصل نہیں کیا گیا۔ وسیم زوار کے مطابق انہوں نے تھانہ پرانی انار کلی میں مقدمہ درج کرنے کی درخواست دی تھی تاہم پولیس کی جانب سے کوئی کارروائی نہیں کی گئی۔

عدالت نے فریقین کے دلائل سننے کے بعد کیس کی مزید سماعت 14 جنوری تک ملتوی کر دی ہے۔