کینسر کے باعث اداکارہ طاہرہ ہاشمی کسمپرسی کا شکار، حکومت سے مدد کی اپیل

فلم اور اسٹیج کی دنیا میں اپنی شاندار اور منفرد اداکاری سے الگ پہچان بنانے والی سینئر اداکارہ طاہرہ ہاشمی آج کینسر جیسے موذی مرض، شدید غربت اور بے بسی کی تصویر بنی ہوئی ہیں۔ مستانہ، البیلا، ببو برال اور سہیل احمد جیسے عظیم اداکاروں کے ساتھ کام کرنے والی فنکارہ کے حالات اس نہج پر پہنچ چکے ہیں کہ بیماری کی شدت کے ساتھ ساتھ دو وقت کی روٹی اور چھت کا نظام چلانا بھی انتہائی مشکل ہو چکا ہے۔

اداکارہ کا اکلوتا بیٹا بھی معذوری کے باعث اپنی بیمار ماں کی کفالت اور دیکھ بھال سے قاصر ہے۔ گھر میں کوئی دوسرا کمانے والا فرد نہ ہونے کے باعث علاج معالجے کے تمام اخراجات بند ہو چکے ہیں۔ کسمپرسی اور بے سہارا زندگی گزارنے پر مجبور طاہرہ ہاشمی نے پنجاب حکومت، شوبز انڈسٹری کی شخصیت اور مخیر حضرات سے فوری مالی و طبی مدد کی اپیل کرتے ہوئے کہا ہے کہ ان کی زندگی شدید مشکلات کا شکار ہے اور حکومت ان کے علاج اور سرپرستی کا فوری انتظام کرے۔