ایران کا روس سے جدید فضائی دفاعی نظام ’وربا‘ خریدنے کا خفیہ معاہدہ

ایران اور روس کے درمیان جدید فضائی دفاعی نظام کی فراہمی کا اہم معاہدہ طے پا گیا ہے، جس کے تحت ایران کو ہزاروں جدید میزائل فراہم کیے جائیں گے۔

برطانوی اخبار فنانشل ٹائمز کی رپورٹ کے مطابق ایران نے اپنے فضائی دفاعی ڈھانچے کو مضبوط بنانے کے لیے روس کے ساتھ تقریباً 60 کروڑ ڈالر مالیت کے اسلحے کی خریداری کا خفیہ معاہدہ کیا۔

ذرائع کے مطابق یہ سمجھوتہ دسمبر میں ماسکو میں طے پایا، جس کے تحت روس آئندہ تین برسوں میں ایران کو 500 وربا لانچ یونٹس اور 2500 جدید میزائل فراہم کرے گا۔

وربا نظام روس کے جدید ترین پورٹیبل فضائی دفاعی نظاموں میں شامل ہے اور اسے کندھے پر رکھ کر فائر کیا جا سکتا ہے۔ یہ نظام کم بلندی پر پرواز کرنے والے طیاروں، کروز میزائلوں اور بغیر پائلٹ طیاروں کو نشانہ بنانے کی بھرپور صلاحیت رکھتا ہے۔

رپورٹ میں کہا گیا ہے کہ دفاعی نظام کی فراہمی تین مرحلوں میں 2027 سے 2029 کے دوران مکمل ہوگی، تاہم یہ بھی امکان ظاہر کیا گیا ہے کہ کچھ نظام پہلے ہی ایران کے حوالے کیے جا چکے ہوں۔