جنوبی کوریا میں تمام شہریوں کو مفت اے آئی سروسز ملیں گی

جنوبی کوریا نے اپنے تمام تقریباً 5 کروڑ 20 لاکھ شہریوں کو پبلک براڈ بینڈ اور تعلیم کی طرز پر آرٹیفیشل انٹیلی جنس (اے آئی) کی مفت اور لامحدود سہولیات فراہم کرنے کا تاریخی فیصلہ کیا ہے۔ سائنس اور آئی سی ٹی کی وزارت کے ‘اے آئی فار ایوری ون’ منصوبے کے تحت شہریوں کو صحت، مالیات اور روزمرہ زندگی کے امور میں مدد کے لیے جدید اے آئی چیٹ بوٹس تک مفت رسائی دی جائے گی، جس کے ذریعے جنوبی کوریا مصنوعی ذہانت کو لازمی عوامی ضرورت تسلیم کرنے والا دنیا کا پہلا ملک بننے جا رہا ہے۔ حکومت نے اس مقصد کے لیے 3 سنڈیکیٹس کو 512 این ویڈیا B200 گرافکس پروسیسنگ یونٹس (GPUs) فراہم کرنے کا اعلان کیا ہے، جبکہ ستمبر تک معاہدے کے بعد رواں سال کے اختتام تک سروس تمام شہریوں کے لیے فعال کر دی جائے گی جس کے تمام اخراجات 2027 سے حکومت خود برداشت کرے گی۔