ایران کیساتھ جنگ، ٹرمپ کی ساکھ متاثر اور مشرق وسطیٰ میں امریکی پوزیشن کمزور

امریکی اخبار کی ایک تہلکہ خیز رپورٹ میں انکشاف کیا گیا ہے کہ ایران کے ساتھ جنگ شروع ہونے کے 6 ماہ بعد بھی اس کے خاتمے کے کوئی واضح آثار نظر نہیں آ رہے، جبکہ صدر ڈونلڈ ٹرمپ کے مختصر جنگ کے دعوے کے برعکس ایرانی حکومت اب بھی برقرار ہے۔ رپورٹ کے مطابق اس طویل کشیدگی کے باعث آبنائے ہرمز بڑی حد تک بند ہے جس سے مشرق وسطیٰ میں امریکا کی پوزیشن کمزور ہوئی ہے اور خود امریکا کے اپنے ہتھیاروں کے ذخائر میں شدید کمی واقع ہو رہی ہے۔ رپورٹ میں مزید کہا گیا ہے کہ ایرانی قیادت کی جانب سے ڈرونز اور بارودی سرنگوں جیسے کم لاگت ہتھیاروں کے مؤثر استعمال کے بعد جنگی نتائج کو اپنے حق میں موڑنے کی امریکی صلاحیت محدود ہو چکی ہے، جس کے باعث ملک کے اندر ووٹرز میں صدر ٹرمپ کی عوامی مقبولیت اور ساکھ بھی متاثر ہو رہی ہے۔