پمز واقعہ : وزیراعظم کا 8 ذمہ داران کو فوری معطل کرکے فوجداری کارروائی کا حکم

وزیراعظم محمد شہباز شریف کی زیرِ صدارت پمز ہسپتال میں آتشزدگی کے دلخراش واقعے پر اعلیٰ سطحی اجلاس منعقد ہوا، جس میں تحقیقاتی کمیٹی کی عبوری رپورٹ پیش کی گئی۔ وزیراعظم نے مجرمانہ غفلت پر پمز کے ایگزیکٹو ڈائریکٹر پروفیسر ڈاکٹر عمران سکندر اور ڈی جی سی ڈی اے ایمرجنسی سروسز سمیت 8 اعلیٰ افسران کو فوری معطل کر کے ان کے خلاف فوجداری اور محکمانہ کارروائی کی منظوری دیدی۔ اس کے علاوہ سکیورٹی کمپنی کے خلاف کارروائی اور ایکٹنگ ای ڈی کے طور پر ڈاکٹر محمد سلمان کی تعیناتی کا حکم دیا گیا۔ وزیراعظم نے اپنی جان پر کھیل کر بچے کو بچانے والی نرس کو ‘ستارۂ خدمت’ دینے کی منظوری دی جبکہ غفلت کے مرتکب افراد کو کیفرِ کردار تک پہنچانے کا عزم ظاہر کیا۔ عبوری رپورٹ کے مطابق وارڈ میں فائر الارم اور سپرنکلر سسٹم موجود نہیں تھا اور ایمرجنسی سروسز بھی 15 منٹ کی تاخیر سے پہنچیں۔