اشنا شاہ کا وزیراعلیٰ پنجاب مریم نواز کو خط ارسال

اپنی جرات مندانہ گفتگو اور جانوروں سے محبت کے لیے جانی جانے والی اداکارہ اشنا شاہ نے وزیرِ اعلیٰ پنجاب مریم نواز کے نام ایک خط لکھ کر صوبے میں جانوروں کے ساتھ ہونے والے ناروا سلوک کی جانب توجہ دلائی ہے۔ اشنا شاہ نے یہ خط اپنے آفیشل انسٹاگرام اکاؤنٹ پر شیئر کیا، جس میں انہوں نے وزیرِ اعلیٰ کی عوامی تحفظ اور خواتین کی حفاظت کے حوالے سے حالیہ کوششوں کی تعریف بھی کی۔

خط میں اشنا شاہ نے ایک حالیہ دلخراش واقعے کا حوالہ دیتے ہوئے بتایا کہ ایک کتے کو گاڑی سے باندھ کر سڑک پر گھسیٹنے کی ویڈیو نے سوشل میڈیا پر شدید غم و غصہ پیدا کیا ہے۔ انہوں نے لکھا کہ لوگ اس بدسلوکی کو حکومتی بے حسی سے جوڑ رہے ہیں۔ اداکارہ نے نشاندہی کی کہ پنجاب میں ڈاگ فائٹس (کتوں کی لڑائی)، گدھوں پر تشدد اور بازاروں میں فروخت ہونے والے جانوروں کے ساتھ بدسلوکی کے واقعات معمول بنتے جا رہے ہیں، جنہیں روکنے کے لیے کوئی مؤثر نظام موجود نہیں ہے۔

اشنا شاہ نے وزیرِ اعلیٰ کو مشورہ دیا کہ وہ نبی کریم ﷺ کی تعلیمات کی روشنی میں جانوروں کے ساتھ ہمدردی کا مظاہرہ کریں اور اس حوالے سے سخت قوانین نافذ کریں۔ انہوں نے کہا کہ اگر پنجاب میں جانوروں کے حقوق کے لیے عملی اقدامات کیے گئے، تو مریم نواز نہ صرف عوام کے دل جیت سکتی ہیں بلکہ دیگر صوبوں کے لیے بھی ایک مثال قائم کر سکتی ہیں۔