ایرانی تیل کی غیر قانونی ترسیل، امریکا نے چھ بھارتی کمپنیوں پر پابندیاں عائد کر دیں

امریکی محکمہ خزانہ نے ایرانی تیل کی سمندری راستوں سے غیر قانونی ترسیل اور فروخت میں ملوث بھارتی نیٹ ورک کا بھانڈا پھوڑتے ہوئے 6 بھارتی کمپنیوں پر سخت پابندیاں عائد کر دی ہیں۔ امریکی دفتر برائے غیر ملکی اثاثہ جات کنٹرول (OFAC) کے مطابق بھارتی شہری سنیل کمار شرما اور جسپریت پریتی شاہد نے جعلی کمپنیوں کے ذریعے متعدد ممالک کے جعلی بحری سرٹیفکیٹس اور پرچموں کا استعمال کر کے بین الاقوامی قوانین سے بچنے کا ایک نیٹ ورک قائم کر رکھا تھا۔ امریکی حکام نے ان دونوں افراد کے زیرِ اثر چلنے والی 6 کمپنیوں کو بلیک لسٹ کرتے ہوئے امریکا میں موجود ان کے تمام اثاثے منجمد کرنے کا حکم دیا ہے۔ رپورٹ کے مطابق ایران اور روس کے ساتھ غیر قانونی تجارت میں ملوث ہونے کی بناء پر اب تک 175 سے زائد بھارتی اداروں اور کمپنیوں پر امریکی پابندیاں لگ چکی ہیں۔