کراچی کے مسائل حل کرنے کیلئے پوری طاقت سے آواز اٹھانا ہوگی: حافظ نعیم الرحمان

امیر جماعت اسلامی پاکستان حافظ نعیم الرحمان نے بلدیاتی اداروں کی زبوں حالی اور کراچی کے دیرینہ مسائل پر گفتگو کرتے ہوئے کہا ہے کہ دنیا بھر میں تعلیم و صحت سمیت تمام بنیادی بلدیاتی نظام مقامی حکومتوں کے تحت چلتے ہیں، لیکن پاکستان میں بلدیاتی ادارے مکمل طور پر صوبائی حکومتوں کے رحم و کرم پر ہیں۔ کراچی کے حقوق کے لیے شہریوں کو پوری طاقت کے ساتھ آواز اٹھانا ہوگی۔

ایک تقریب سے خطاب کرتے ہوئے حافظ نعیم الرحمان نے کہا کہ اسلام آباد میں پانچویں بار بلدیاتی انتخابات کا التوا اور نئی تاریخ کا اعلان ہوا ہے، جبکہ پنجاب میں بلدیاتی انتخابات سرے سے کرائے ہی نہیں گئے۔ انہوں نے تنقید کرتے ہوئے کہا کہ جو لوگ موجودہ سسٹم کے خلاف تقاریر کرتے ہیں، وہی عملی طور پر اس ظالمانہ نظام کے ساتھ تعاون کر کے تمام تر ابتر صورتحال کے ذمہ دار ہیں۔

کراچی کے میگا پروجیکٹس پر بات کرتے ہوئے امیر جماعت اسلامی نے کہا کہ 2005ء سے زیرِ التوا ‘کے فور’ (K-IV) واٹر پروجیکٹ کو جان بوجھ کر مکمل نہیں ہونے دیا گیا۔ اگر یہ منصوبہ بروقت مکمل ہو جاتا تو شہر کے ہر گھر میں پانی آتا۔ انہوں نے طنز کرتے ہوئے کہا کہ پیپلز پارٹی کے بلاول بھٹو زرداری کے اپنے گھر میں بھی پانی ٹینکرز سے آتا ہے، تو 18 سالہ اقتدار کا کیا فائدہ ہوا؟ انہوں نے مزید کہا کہ سیوریج کا ’ایس تھری‘ منصوبہ 12 سال سے معطل ہے، 2016ء میں شروع ہونے والی گرین لائن بس سروس تاحال مکمل فعال نہیں ہو سکی، ریڈ لائن منصوبے نے مرکزی شاہراہوں کو تباہ کر دیا ہے جبکہ کے آر ٹی کے نام پر سرکلر ریلوے کے 8 افتتاح ہونے کے باوجود شہر کی پبلک ٹرانسپورٹ بحال نہ ہو سکی۔