امریکا کا مشرقِ وسطیٰ میں 25 ہزار ڈرون اور اینٹی ڈرون سسٹم نصب کرنے کا اعلان

امریکی محکمہ دفاع (پینٹاگون) نے مشرقِ وسطیٰ میں تعینات امریکی افواج کے تحفظ کو یقینی بنانے کے لیے 78 کروڑ 20 لاکھ ڈالر مالیت کے 25 ہزار سے زائد جدید ڈرون اور اینٹی ڈرون سسٹمز کی فراہمی کا اعلان کر دیا ہے۔ امریکی سینٹرل کمانڈ (سینٹ کام) کے مطابق موصول ہونے والے فوجی سازوسامان میں 24 ہزار سے زائد اینٹی ڈرون سسٹمز، 1300 سے زیادہ حملہ آور ڈرونز کے ساتھ ساتھ 100 سے زائد بغیر پائلٹ بحری اور زیرِ آب گاڑیاں شامل ہیں۔ پینٹاگون کے بیان کے مطابق اس جدید عسکری توازن اور ٹیکنالوجی کی فراہمی کا بنیادی مقصد خطے میں امریکی فوجیوں کو بڑھتے ہوئے ڈرون حملوں سے بچانا ہے۔ حکام نے مزید بتایا کہ مشرقِ وسطیٰ میں اس مرحلے کی مکمل فراہمی کے بعد یہی جدید جنگی سسٹمز بحرالکاہل اور یورپ میں تعینات امریکی افواج کو بھی منتقل کیے جائیں گے۔