امریکی ٹیکنالوجی کمپنی نے پاکستان میں اپنا ریجنل آفس قائم کردیا

امریکی ٹیکنالوجی کمپنی موبیز (Mobiz) نے پاکستان میں اپنا علاقائی (ریجنل) دفتر قائم کر دیا ہے، جس کے تحت کراچی میں نئے آفس کا باضابطہ آغاز کر دیا گیا ہے۔ ایس ای سی پی (SECP) کے چیئرمین ڈاکٹر کبیر احمد سدھو نے موبیز آفس کے قیام کا خیرمقدم کرتے ہوئے مبارکباد دی اور اسے ملکی آئی ٹی ٹیلنٹ پر بین الاقوامی اعتماد کا مظاہرہ قرار دیا۔ انہوں نے بتایا کہ سلیکون ویلی میں قائم موبیز ایک پاکستانی ملکیت والی کمپنی ہے جو عالمی سطح پر کلاؤڈ، ڈیٹا، مصنوعی ذہانت (AI) اور سائبر سیکیورٹی کے شعبوں میں خدمات فراہم کر رہی ہے۔ چیئرمین ایس ای سی پی نے اس عزم کا اظہار کیا کہ عالمی ٹیکنالوجی کمپنیوں کی پاکستان میں آمد سے مقامی نوجوانوں کے لیے روزگار کے نئے مواقع پیدا ہوں گے اور پاکستان کو علاقائی آئی ٹی اور گلوبل سروسز کا مرکز بنانے میں مدد ملے گی۔