حملوں میں ایران کے فضائی دفاعی اور میزائل نظام کو نشانہ بنایا گیا، امریکی حکام

امریکی حکام نے دعویٰ کیا ہے کہ ایران پر کیے گئے حالیہ حملوں میں اس کے فضائی دفاعی اور میزائل نظام کو کامیابی سے نشانہ بنایا گیا ہے۔

امریکی عہدیدار کے مطابق ان فوجی کارروائیوں کا بنیادی مقصد ایران کے فضائی دفاعی نظام، ساحلی نگرانی کے نظام، زمین سے فضا میں مار کرنے والے میزائلوں، بحری جہاز شکن کروز میزائلوں اور ڈرون لانچ سائٹس کو مفلوج کرنا تھا۔ جاری کردہ بیان میں واضح کیا گیا ہے کہ ان تمام اہداف کا تعلق آبنائے ہرمز میں تجارتی جہازوں پر ہونے والے ایرانی حملوں سے تھا، جہاں گزشتہ کچھ عرصے سے مختلف بحری راستوں کے کنٹرول کے معاملے پر دونوں ممالک کے درمیان کشیدگی میں شدید اضافہ دیکھا جا رہا ہے۔

رپورٹ کے مطابق، ایران اور امریکہ کے درمیان اس وقت بحری راستوں کے حوالے سے تنازع چل رہا ہے۔ ایران کا اصرار ہے کہ بین الاقوامی تجارتی جہاز اس کی زیرِ نگرانی شمالی بحری راستوں سے گزریں، جبکہ دوسری جانب امریکہ جنوبی راستے کو اختیار کرنے کی بھرپور حمایت کر رہا ہے۔

معاملات اس وقت مزید پیچیدہ ہوئے جب آبنائے ہرمز کے وسط سے گزرنے والے روایتی بحری راستے کو بارودی سرنگوں کی ممکنہ موجودگی کے خدشات کے باعث غیر محفوظ اور ناقابل استعمال قرار دے دیا گیا۔ ذرائع کا کہنا ہے کہ ان تمام تصفیہ طلب امور پر ایران اور امریکہ کے درمیان شیڈول مذاکرات میں تفصیلی بات چیت ہونا تھی، تاہم حالیہ فوجی کارروائیوں نے خطے کی صورتحال کو مزید سنسنی خیز بنا دیا ہے۔