نئے انتظامی یونٹس سے صرف کراچی نہیں، پورے پاکستان کے مسائل حل ہوں گے: مصطفیٰ کمال

وفاقی وزیرِ صحت مصطفیٰ کمال نے ٹی وی پروگرام ”سنو ٹو نائٹ ود ثمر عباس“ میں گفتگو کرتے ہوئے کہا ہے کہ ملک میں نئے انتظامی یونٹس کا قیام وقت کی اہم ترین ضرورت ہے اور اس سے صرف کراچی ہی نہیں بلکہ پورے پاکستان کے مسائل حل ہوں گے۔ انہوں نے دنیا بھر کی مثال دیتے ہوئے کہا کہ جدید ممالک نے انتظامی یونٹس قائم کر کے ہی ترقی حاصل کی ہے۔ مصطفیٰ کمال نے واضح کیا کہ وہ موجودہ جغرافیائی حدود کو چھیڑے بغیر نئے صوبے اور انتظامی یونٹس بنانے کی مکمل حمایت کرتے ہیں۔ انہوں نے نئے صوبوں سے متعلق میاں عامر محمود کی تجاویز کی بھی تائید کی اور اس بات پر زور دیا کہ اختیارات کی نچلی سطح تک منتقلی اور انتظامی ڈھانچے کی بہتری سے عوامی مسائل کے فوری حل میں مدد ملے گی۔