پٹرولیم لیوی واپس لینے تک حکومت کے خلاف دھرنا جاری رہے گا، حافظ نعیم

امیر جماعت اسلامی حافظ نعیم الرحمان نے فیصل چوک مال روڈ لاہور میں پٹرولیم لیوی اور مہنگائی کے خلاف دھرنے سے خطاب کرتے ہوئے حکمران طبقے کو شدید تنقید کا نشانہ بنایا ہے۔ انہوں نے کہا کہ حکومت صرف پیٹرول کی قیمتیں ہی نہیں بڑھاتی بلکہ اس پر اضافی ٹیکسز کا بوجھ بھی عوام پر ڈال دیتی ہے۔ انہوں نے واضح کیا کہ جماعت اسلامی کی جانب سے لاہور، کراچی اور پشاور کے گورنر ہاؤسز کے باہر دھرنے شروع ہو چکے ہیں جو حکومت کے گھٹنے ٹیکنے تک جاری رہیں گے۔ حافظ نعیم الرحمان نے حکومت کی جانب سے مذاکراتی کمیٹی کی پیشکش کو مسترد کرتے ہوئے کہا کہ وہ کسی بریفنگ کے لیے اسلام آباد نہیں جائیں گے اور بات چیت صرف پٹرولیم لیوی کے خاتمے پر ہی ہو گی۔ انہوں نے جاگیردارانہ اور بیوروکریٹک نظام کو تنقید کا نشانہ بناتے ہوئے مطالبہ کیا کہ حکمران اپنی مراعات ختم کریں اور غریب عوام کا استحصال بند کریں۔