مون سون کا ایک اور سپیل برسنے کو تیار، 17 سے 21 اگست تک بارشوں کی پیشگوئی

محکمہ موسمیات نے ملک کے بالائی اور وسطی علاقوں میں 17 سے 21 اگست کے دوران تیز ہواؤں، گرج چمک اور وقفے وقفے سے بارشوں کی پیشگوئی کی ہے۔ ترجمان محکمہ موسمیات کے مطابق مرطوب مون سون ہوائیں ملک کے بالائی حصوں میں داخل ہو رہی ہیں، جبکہ 17 اگست سے مغربی ہواؤں کا سلسلہ بھی بالائی علاقوں کو اپنی لپیٹ میں لے گا۔ اس کے نتیجے میں کشمیر، خیبر پختونخوا، اسلام آباد، گلگت بلتستان اور بلوچستان کے متعدد علاقوں میں گرج چمک کے ساتھ بارش کا امکان ہے، جبکہ یہ سسٹم آئندہ چند دنوں تک برقرار رہے گا۔ دوسری جانب، محکمہ موسمیات نے سندھ اور بلوچستان کے بیشتر دیگر علاقوں میں موسم گرم اور مرطوب رہنے کی پیشگوئی کی ہے۔