حکومتی یقین دہانی پر گڈز ٹرانسپورٹرز نے ہڑتال 40 دن کیلئے مؤخر کردی

حکومتی نمائندوں اور گڈز ٹرانسپورٹرز کے درمیان کامیاب مذاکرات کے بعد آل پاکستان گڈز ٹرانسپورٹرز نے گزشتہ 9 دن سے جاری اپنی ملک گیر ہڑتال کو 40 دن کے لیے مؤخر کرنے کا اعلان کر دیا ہے۔ گورنر ہاؤس کراچی میں ہونے والے اس اہم اجلاس میں گورنر سندھ نہال ہاشمی، میئر کراچی مرتضیٰ وہاب، وفاقی وزیر مواصلات عبدالعلیم خان اور صدر آل پاکستان گڈز ٹرانسپورٹرز ملک شہزاد نے شرکت کی। مذاکرات کے بعد مشترکہ پریس کانفرنس کرتے ہوئے ملک شہزاد نے بتایا کہ حکومت نے ٹول ٹیکس پر نظرثانی، پیٹرولیم مصنوعات کی قیمتوں کے تعین اور پارکنگ کے مسائل حل کرنے کے لیے مختلف کمیٹیوں کی تشکیل اور وقت کی یقین دہانی کرائی ہے۔

اس موقع پر وفاقی وزیر عبدالعلیم خان نے کہا کہ ٹرانسپورٹرز کے باقی مسائل حل کرنے کے لیے کمیٹیاں کام کریں گی، نیز انہوں نے کراچی-حیدرآباد موٹروے کے معیار پر تحفظات کا اظہار کرتے ہوئے سکھر سے حیدرآباد اور کراچی تک نئی موٹروے کا منصوبہ اسی سال شروع کرنے کا اعلان کیا۔ گورنر سندھ نہال ہاشمی اور میئر کراچی مرتضیٰ وہاب نے مذاکرات کی کامیابی کو ملکی معاشی مفاد میں اہم قرار دیا اور اپنے دائرہ اختیار میں آنے والے تمام مسائل کو ترجیحی بنیادوں پر حل کرنے کے عزم کا اعادہ کیا۔