بہتر گورننس کیلئے ملک میں مزید انتظامی یونٹس بننے چاہئیں: ماہرین

سسٹین ایبل ڈیولپمنٹ پالیسی انسٹی ٹیوٹ (ایس ڈی پی آئی) کے زیراہتمام ’’کیا ملک میں نئے انتظامی یونٹس قائم ہونے چاہئیں؟‘‘ کے عنوان سے ایک قومی مباحثے کا انعقاد کیا گیا، جس میں ممتاز ماہرین، معاشی دانوں، صحافیوں اور سیاسی شخصیات نے شرکت کی۔ مباحثے میں اس بات پر اتفاق کیا گیا کہ بہتر طرزِ حکمرانی، انتظامی کارکردگی اور عوامی مسائل کے ان کی دہلیز پر حل کے لیے مزید انتظامی یونٹس اور مضبوط بلدیاتی نظام کا قیام ضروری ہے۔

پنجاب گروپ کے چیئرمین میاں عامر محمود نے کہا کہ نئے انتظامی یونٹس بننے سے سب سے زیادہ فائدہ بلوچستان اور سندھ کو ہوگا اور اس کا مقصد کسی علاقے کو تقسیم کرنا نہیں بلکہ عوام کی فلاح و بہبود ہے۔ وفاقی پارلیمانی سیکرٹری دانیال چودھری نے بنیادی مسائل کے حل پر زور دیا جبکہ معاشی ماہرین خاقان نجیب اور فرخ سلیم نے کہا کہ پاکستان کا اصل مسئلہ اوپر کی سطح پر اصلاحات اور حکومتی اخراجات کا انداز ہے، اور چھوٹے انتظامی یونٹس سے عوامی شمولیت میں اضافہ ممکن ہے۔ صحافی محمد مالک نے موجودہ انتظامی ڈھانچے کو موثر بنانے کی بات کی، جبکہ وزیراعظم کے معاون خصوصی رانا احسان افضل نے درست ڈیٹا کی دستیابی اور سرمایہ کاری کے لیے سازگار ماحول کی ضرورت پر روشنی ڈالی۔