ایمان مزاری اور ہادی چٹھہ کی سزا معطلی کی درخواستیں سماعت کیلئے مقرر

سپریم کورٹ آف پاکستان نے متنازع ٹوئٹس کیس میں انسانی حقوق کی وکیل ایمان مزاری اور ان کے شوہر ہادی علی چٹھہ کی سزا معطلی کی درخواستیں سماعت کے لیے مقرر کر دی ہیں۔ جسٹس نعیم اختر افغان کی سربراہی میں دو رکنی بنچ 19 اگست کو ان درخواستوں پر سماعت کرے گا، جبکہ جسٹس اشتیاق ابراہیم بھی بنچ کا حصہ ہوں گے۔ سپریم کورٹ نے کیس کے تمام فریقین کو نوٹسز جاری کر دیے ہیں اور عدالت آئندہ سماعت کے دوران درخواست گزاروں کی سزا معطلی کی استدعا اور دیگر قانونی نکات کا جائزہ لے گی۔ واضح رہے کہ ایمان مزاری اور ہادی علی چٹھہ کو پیکا (PECA) ایکٹ کے تحت مجموعی طور پر 17، 17 سال قید اور 3 کروڑ 60 لاکھ روپے جرمانے کی سزا سنائی گئی ہے۔