آزاد کشمیر میں مخصوص نشستوں کی پولنگ کب ہوگئی، شیڈول کا اعلان کردیا گیا

الیکشن کمیشن آزاد جموں و کشمیر نے قانون ساز اسمبلی کی 8 مخصوص نشستوں کے انتخاب کا باقاعدہ شیڈول جاری کر دیا ہے۔ شیڈول کے مطابق ان نشستوں پر پولنگ 24 اگست کو ہو گی۔ مخصوص نشستوں کے لیے امیدوار 20 اگست تک اپنے کاغذاتِ نامزدگی جمع کروا سکیں گے، جس کے بعد ریٹرننگ آفیسر اسی دن کاغذات کی اسکروٹنی مکمل کر کے اہل امیدواروں کی ابتدائی فہرست جاری کریں گے۔

الیکشن کمیشن کے ترجمان کے مطابق کاغذاتِ نامزدگی کی منظوری یا مسترد ہونے کے خلاف اپیلیں 21 اگست کو دائر کی جا سکیں گی، جبکہ الیکشن کمیشن 22 اگست کو ان اپیلوں پر سماعت کر کے فیصلے سنائے گا۔ امیدواروں کی حتمی فہرست 23 اگست کو شائع کی جائے گی، جس کے بعد 24 اگست کو قانون ساز اسمبلی میں پولنگ کا عمل مکمل کیا جائے گا۔