امریکا میں قتل کیے گئے 6 سالہ فلسطینی بچے کے نام سے سڑک منسوب کردی گئی

امریکی ریاست الینوائے میں ایک سڑک کا نام اکتوبر 2023 میں اسلاموفوبیا پر مبنی نفرت انگیز حملے میں بہیمانہ طور پر قتل کیے جانے والے 6 سالہ فلسطینی نژاد امریکی بچے ودیع الفیومی کے نام پر رکھ دیا گیا ہے۔ نام تبدیل کرنے کی اس پروقار تقریب میں مقامی حکام، کمیونٹی رہنماؤں اور مقتول بچے کے اہل خانہ نے شرکت کی، جہاں اس شاہراہ کو “ودیع الفیومی، لٹل پیلسٹائن وے” کا نام دیا گیا تاکہ معصوم بچے کی یاد کو ہمیشہ کے لیے زندہ رکھنے کے ساتھ ساتھ نفرت پر مبنی جرائم کے خلاف ایک مضبوط علامتی پیغام دیا جا سکے۔ واضح رہے کہ ودیع الفیومی کو 14 اکتوبر 2023 کو الینوائے کے علاقے پلین فیلڈ میں غزہ جنگ کے تناظر میں مسلم شناخت سے نفرت کے باعث مکان مالک جوزف چزوبا نے چاقو کے وار کر کے قتل اور اس کی والدہ کو شدید زخمی کر دیا تھا، جسے بعد ازاں امریکی عدالت نے 53 سال قید کی سزا سنائی۔ مقامی رہنماؤں کے مطابق، سڑک کا نام تبدیل کرنے کا مقصد یہ واضح کرنا ہے کہ معاشرے میں مذہب، نسل یا قومیت کی بنیاد پر نفرت اور تشدد کی کوئی گنجائش نہیں ہے۔