سوشل میڈیا کمپنیوں کے خلاف تاریخی مقدمہ، آپریٹنگ طریقہ کار بدلنے کا امکان

امریکا میں سوشل میڈیا کمپنیوں کے خلاف ایک اہم اور تاریخی مقدمہ لاس اینجلس کی اعلیٰ عدالت میں زیرِ سماعت ہے، جس میں دعویٰ کیا گیا ہے کہ پلیٹ فارمز جان بوجھ کر صارفین کو نشہ آور بنانے میں ملوث ہیں، بالکل ویسے ہی جیسے 1980 کی دہائی میں تمباکو صنعت نے لوگوں کو عادی بنایا تھا۔

مقدمے میں مجموعی طور پر 22 بیل ویدر کیسز شامل ہیں، اور پہلے مقدمے میں مارک زکربرگ سمیت دیگر بڑی ٹیک کمپنیوں کے سربراہان کے بیانات متوقع ہیں۔

سوشل میڈیا کمپنیوں کا دفاع امریکا کے مواصلاتی ایکٹ کے سیکشن 230 پر مبنی ہے، جو آن لائن پلیٹ فارمز کو صارفین کے تیار کردہ مواد کی قانونی ذمہ داری سے مستثنیٰ قرار دیتا ہے۔ موجودہ مقدمہ اس قانونی تحفظ کو ایک نئے زاویے سے چیلنج کر رہا ہے۔

گذشتہ برسوں میں نوجوانوں کی ذہنی صحت پر منفی اثرات کے الزامات کے تحت متعدد افراد اور اداروں نے انسٹاگرام، فیس بک، یوٹیوب، ٹک ٹاک اور سنیپ چیٹ کے خلاف قانونی کارروائی کی کوشش کی تھی، مگر اب تک وہ کامیاب نہیں ہو سکے۔