بغیر دوا جلد نیند لانے والا جدید الٹراساؤنڈ پیچ تیار

امریکا کی یونیورسٹی آف ٹیکساس کے ماہرین نے ایک انتہائی جدید اور پہننے کے قابل پیچ (Patch) تیار کیا ہے جو بغیر کسی سرجری، دوا یا دواگوئی کے انسانوں کو تیزی سے آر ای ایم (Rapid Eye Movement) یعنی گہری نیند کے مرحلے میں داخل ہونے اور اس میں زیادہ وقت گزارنے میں مدد فراہم کرتا ہے۔ سائنسدانوں کے مطابق ‘نیوزلیپ’ (NEUSLeeP) نامی اس ڈیوائس میں جدید ترین الیکٹروڈز اور الٹراساؤنڈ ٹیکنالوجی کا ملاپ کیا گیا ہے جو نہ صرف دماغی سرگرمی کی مسلسل اور حقیقی وقت (Real-time) میں نگرانی کرتی ہے، بلکہ دماغ کے ان گہرے حصوں کو بغیر کسی جسمانی مداخلت کے متحرک کرتی ہے جو نیند کے اس اہم مرحلے کے ذمے دار ہیں۔

متبادل علاج اور بغیر دوا کے نیند بہتر بنانے کی اس کوشش کے دوران سائنسدانوں نے 28 افراد پر کامیابی سے تجربات کیے، جس کے تفصیلی نتائج معروف سائنسی جریدے نیچر کمیونیکیشنز میں شائع ہوئے ہیں۔ تحقیق سے معلوم ہوا کہ اس ڈیوائس کو استعمال کرنے والے افراد عام معمول کے مقابلے میں اوسطاً 43 منٹ پہلے REM نیند کے مرحلے میں پہنچے اور انہوں نے اس مرحلے میں تقریباً 16 منٹ اضافی گزارے۔ ماہرین کا کہنا ہے کہ یہ مثبت اثرات صحتمند افراد کے ساتھ ساتھ نیند کے مسائل سے دوچار مریضوں دونوں میں یکساں طور پر دیکھے گئے، جبکہ تمام شرکاء نے ڈیوائس کو نہایت آرام دہ قرار دیا اور اس کے کوئی سنگین مضر اثرات سامنے نہیں آئے۔

اس تحقیق میں مزید انکشاف ہوا کہ الٹراساؤنڈ اسٹیمولیشن سے جسمانی اور ذہنی تناؤ کو کنٹرول کرنے والے نظام پر مثبت اثرات مرتب ہوتے ہیں۔ صحت مند شرکاء میں دل کی دھڑکن کے اتار چڑھاؤ (Heart Rate Variability) میں نمایاں بہتری دیکھی گئی، جس کا مستحکم ہونا جسم میں تناؤ سے نمٹنے کی بہترین صلاحیت کا عکاس ہے۔ اس کے علاوہ دماغی اسکینز نے دکھایا کہ جذبات پر قابو پانے والے دماغی سرکٹس کی کارکردگی میں بھی مثبت تبدیلیاں آئیں۔

محققین کے مطابق یہ پیشرفت اس لحاظ سے انتہائی اہم ہے کیونکہ REM نیند میں مسلسل خلل کو ڈپریشن، شدید بے چینی اور پوسٹ ٹرامیٹک اسٹریس ڈس آرڈر (PTSD) جیسی ذہنی بیماریوں کی بڑی وجہ مانا جاتا ہے۔ تاہم، سائنسدانوں نے واضح کیا ہے کہ نیوزلیپ کو باقاعدہ طور پر عام علاج کے لیے پیش کرنے سے پہلے بڑے پیمانے پر تحقیق کی ضرورت ہے۔ ان کا مقصد یہ دیکھنا ہے کہ آیا یہ ڈیوائس دائمی بے خوابی (Insomnia)، شدید ڈپریشن اور دیگر نفسیاتی مسائل سے متاثرہ افراد کو مستقل طور پر صحت یاب کرنے میں کتنا مؤثر کردار ادا کر سکتی ہے۔