صدر ٹرمپ کا امریکی افواج کو ایران پر ایک روز کیلئے حملے روکنے کا حکم

امریکی صدر ڈونلڈ ٹرمپ نے سفارت کاری کو ایک اور موقع دینے کے لیے امریکی افواج کو ایک روز کے لیے ایران پر نئے حملوں سے روک دیا۔ امریکی میڈیا رپورٹس کے مطابق جمعے کے روز جاری کی جانے والی اس ہدایت کے ساتھ ہی گزشتہ تقریباً دو ہفتوں سے مسلسل جاری روزانہ کے فضائی حملوں کا سلسلہ وقتی طور پر تھم گیا ہے۔ تاہم، رپورٹ میں واضح کیا گیا ہے کہ اگر صدر ٹرمپ دوبارہ حملوں کا حکم دیتے ہیں تو امریکی فوج انتہائی مختصر نوٹس پر کارروائی دوبارہ شروع کرنے کی مکمل صلاحیت رکھتی ہے۔

دوسری جانب ذرائع کا کہنا ہے کہ عمانی وفد جمعے کو آبنائے ہرمز کو دوبارہ کھولنے سے متعلق نئے انتظامات پر بات چیت کے لیے تہران پہنچا تھا۔ ان مذاکرات میں مثبت پیشرفت کی اطلاعات ہیں اور یہ امکان ظاہر کیا جا رہا ہے کہ عمان اور ایران کے درمیان ہفتے کے اختتام تک اس معاملے پر باضابطہ معاہدہ طے پا جائے گا۔