چڑیا گھر سے 2 شیر فرار ہونے کی افواہ، اے آئی تصویر نے امریکا میں ہلچل مچا دی

امریکی ریاست اوہائیو کے شہر اکرون میں مصنوعی ذہانت (AI) سے تیار کردہ ایک جعلی تصویر کے باعث شہریوں میں چڑیا گھر سے دو افریقی شیروں کے فرار ہونے کی افواہ پھیل گئی، جس نے پورے شہر میں خوف و ہراس پیدا کر دیا۔ سوشل میڈیا پر وائرل تصویر میں دو شیروں کو سڑک پر کوڑے دان کے قریب گھومتے دکھایا گیا تھا، جس کے بعد افواہوں کا بازار گرم ہو گیا۔ اکرون چڑیا گھر کی انتظامیہ نے فوری وضاحت جاری کرتے ہوئے بتایا کہ افریقی شیروں کے فرار کی خبریں بالکل بے بنیاد ہیں اور چڑیا گھر کے چاروں شیر اپنے مخصوص احاطے میں مکمل محفوظ ہیں۔ انتظامیہ نے مزید کہا کہ وائرل تصویر اے آئی سے تخلیق کردہ ہے اور اس غلط فہمی کو بڑھانے میں رواں ہفتے پولیس کے ساتھ کی جانے والی معمول کی حفاظتی مشقوں نے بھی کردار ادا کیا۔