سعودی عرب اور حرمین شریفین کی سلامتی پاکستان کی اولین ترجیح ہے: ترجمان پاک فوج

پاک فوج کے شعبہ تعلقات عامہ (آئی ایس پی آر) کے سربراہ لیفٹیننٹ جنرل احمد شریف چودھری نے عرب اخبار ’الشرق الاوسط‘ کو دیے گئے خصوصی انٹرویو میں واضح کیا ہے کہ سعودی عرب اور حرمین شریفین کی سلامتی و خودمختاری کا تحفظ پاکستان کی اولین ترجیح ہے اور پاکستان موجودہ حالات میں سعودی عرب کے دفاع کے لیے تمام ضروری اقدامات کرنے کو مکمل تیار ہے۔ ڈی جی آئی ایس پی آر نے کہا کہ پاکستان سعودی عرب کو دفاعی مقاصد کے لیے فوجی اہلکار، عسکری صلاحیتیں، تربیت اور لاجسٹک معاونت فراہم کرے گا، جبکہ پاکستانی دستے پہلے ہی وہاں دفاعی و تربیتی ذمہ داریاں انجام دے رہے ہیں۔ انہوں نے سعودی شہروں اور اقتصادی تنصیبات پر حملوں کی شدید مذمت کرتے ہوئے بتایا کہ ان حملوں کے بعد ’مکہ دفاعی اتحاد‘ کی ذمہ داریوں پر عملی پیش رفت شروع ہو چکی ہے۔ مزید برآں، انہوں نے 26 اکتوبر کو فیلڈ مارشل عاصم منیر کی تہران ملاقات کو علاقائی کشیدگی کم کرنے اور مذاکرات کے ذریعے تنازعات کے پرامن حل کی کوشش قرار دیا۔