شارجہ میں ننھے سائنس دانوں کا روبوٹک گاڑیاں اور دلچسپ مشینیں تیار کرنے کا عملی مظاہرہ

متحدہ عرب امارات میں جاری 45ویں شارجہ بین الاقوامی کتاب میلے میں بچوں اور نوجوانوں کے لیے جدید ٹیکنالوجی، کمپیوٹر پروگرامنگ، انجینئرنگ اور تخلیقی فنون کی دلچسپ اور معلوماتی ورکشاپس کا انعقاد کیا گیا، جہاں کم عمر شرکا نے پروگرامنگ کے ذریعے چھوٹی گاڑیاں چلانے، قدموں کی تعداد گننے والی اسمارٹ گھڑیاں بنانے اور مختلف مشینوں کے ماڈلز تیار کرنے کا عملی تجربہ حاصل کیا۔

شارجہ بک اتھارٹی کے مطابق کتاب میلے کے ‘ڈسکوری زون’ میں منعقدہ ’’پروگرامنگ کار‘‘ ورکشاپ میں 11 سے 17 سال کی عمر کے بچوں اور نوجوانوں نے کمپیوٹر پروگرامنگ کے بنیادی اصول سیکھے۔ شرکا نے ایک چھوٹی پروگرام ایبل گاڑی کو مختلف ہدایات دے کر حرکت کروائی اور یہ عملی طور پر جانا کہ کوڈنگ اور الگورتھم کے ذریعے مشینوں سے مخصوص کام کیسے لیے جاتے ہیں۔

دوسری جانب میلے کے فٹنس اور جسمانی صحت کے خصوصی زون میں 8 سے 10 سال کی عمر کے بچوں کے لیے ’’اپنی صحت کی گھڑی خود بنائیں‘‘ کے عنوان سے ایک منفرد ورکشاپ منعقد ہوئی، جس میں بچوں نے پہننے کے قابل ایسی گھڑیاں ڈیزائن کیں جو چلنے پھرنے کے دوران قدموں کی تعداد گننے میں مدد دیتی ہیں۔ اس سرگرمی کے ذریعے بچوں کو عملی ڈیزائننگ کے ساتھ ساتھ جسمانی سرگرمیوں اور صحت مند طرزِ زندگی کی اہمیت سے بھی روشناس کرایا گیا۔

اسی طرح ایک اور دلچسپ ورکشاپ میں بچوں نے کھلونے اور انعامات اٹھانے والی مشین، جسے ’’کلا مشین‘‘ (Claw Machine) کہا جاتا ہے، کا ماڈل تیار کیا۔ شرکا نے مشین کے مختلف پرزوں کو جوڑنے کے بعد چھوٹی اشیا کو پکڑنے اور اٹھانے کے تجربات کیے، جس سے انہیں مکینیکل انجینئرنگ اور عملی مسائل حل کرنے کی مہارتوں سے آگاہی حاصل ہوئی۔ مزید برآں، ‘آرٹس اینڈ ایکسپریشن زون’ میں منعقدہ ’’دھاگوں سے اظہار‘‘ ورکشاپ میں 8 سے 10 سال کے بچوں نے رنگ برنگے دھاگوں، کپڑے اور کڑھائی کے آلات کی مدد سے اپنے احساسات کو تخلیقی فن پاروں میں ڈھالا، جہاں انہوں نے بادلوں، لہروں اور مختلف اشکال کے ڈیزائن تیار کیے اور اپنے بنائے ہوئے فن پارے بطور یادگار ساتھ لے گئے۔

منتظمین کے مطابق ان ورکشاپس کا بنیادی مقصد بچوں کو محض کتابی معلومات تک محدود رکھنے کے بجائے عملی تجربات کے ذریعے سائنس، ٹیکنالوجی، انجینئرنگ، فنون اور جسمانی صحت سے متعلق جدید مہارتیں سکھانا ہے تاکہ نئی نسل میں تخلیقی سوچ اور سائنسی جستجو کو فروغ دیا جا سکے۔