نئے صوبوں پر ریفرنڈم کرالیں، عوام نہیں چاہتے تو نہ بنائیں: محسن نقوی

وفاقی وزیر داخلہ محسن نقوی نے تجویز دی ہے کہ ملک میں نئے صوبوں کے قیام کے معاملے پر عوامی ریفرنڈم کرا لیا جائے، اگر عوام نہیں چاہتے تو وہ خود بھی کہیں گے کہ صوبے نہ بنائے جائیں۔ میڈیا سے گفتگو کرتے ہوئے انہوں نے کہا کہ سیاسی جماعتیں نئے صوبوں کے حوالے سے عوامی سروے دیکھ لیں جو اس اقدام کے حق میں آ رہے ہیں۔ چیئرمین پیپلز پارٹی بلاول بھٹو زرداری کے بیان پر ردعمل دیتے ہوئے محسن نقوی نے کہا کہ بلاول بھٹو نے ملک میں سیاسی ری سیٹ کی ضرورت پر زور دیا ہے اور ان کی ذاتی رائے بھی یہی ہے کہ تمام چیزیں ری سیٹ ہونی چاہئیں کیونکہ پورا سسٹم ہی ٹھیک ہونے والا ہے۔ وزیر داخلہ نے مزید واضح کیا کہ مولانا فضل الرحمان کو کوئی نوٹس جاری نہیں ہوا بلکہ ان کے 6 سے 7 افراد کو نوٹسز جاری کیے گئے ہیں، جبکہ ملک میں کرپشن کی موجودگی کو تسلیم کرتے ہوئے اس کی اصلاح ناگزیر قرار دی اور اس عزم کا اظہار کیا کہ بانی پی ٹی آئی کو ان کے تمام قانونی حقوق فراہم کیے جائیں گے۔