بانی پی ٹی آئی نے پارلیمانی کمیٹیوں میں واپسی کی تجویز مسترد کر دی، ممکنہ 28 ویں ترمیم کی بھی مخالفت: ذرائع

ذرائع کے مطابق اڈیالہ جیل میں وکلاء سردار لطیف کھوسہ اور بیرسٹر سلمان صفدر سے طویل ملاقات کے دوران بانی پی ٹی آئی نے پارلیمانی کمیٹیوں میں واپسی کی رائے کو مسترد کرتے ہوئے موجودہ حکومت اور پارلیمان کے بائیکاٹ اور سخت مؤقف برقرار رکھنے کی ہدایت کی ہے۔ ذرائع کا کہنا ہے کہ بانی پی ٹی آئی نے 26 ویں اور 27 ویں ترمیم کی طرح کسی بھی ممکنہ 28 ویں آئینی ترمیم کی مخالفت کرتے ہوئے واضح کیا کہ وہ نئے صوبوں کے حق میں ضرور ہیں تاہم موجودہ نظام میں کسی ترمیم کا ساتھ نہیں دیا جا سکتا۔ پارٹی ذرائع کے مطابق بانی پی ٹی آئی نے محمود خان اچکزئی اور علامہ ناصر عباس پر اعتماد کا اظہار کرتے ہوئے وسیع تر اپوزیشن اتحاد اور مولانا فضل الرحمان سمیت دیگر جماعتوں سے رابطوں کے فیصلوں کا اختیار اپوزیشن اتحاد کی قیادت کے پاس برقرار رکھا ہے، جس پر سردار لطیف کھوسہ آج دونوں اپوزیشن رہنماؤں کو بریفنگ دیں گے۔ مزید برآں ذرائع نے بتایا کہ ملاقات میں اہلیہ کی رہائی و علاج اور اہلِ خانہ کے سیاست سے لاتعلق ہونے کے معاملات پر بھی گفتگو ہوئی، جبکہ اڈیالہ جیل جانے سے قبل اور بعد میں بیرسٹر گوہر، اسد قیصر اور بیرسٹر علی ظفر نے بھی لطیف کھوسہ سے مشاورت کی۔