عالمی برادری موسمیاتی تبدیلی سے نمٹنے کے وعدے پورے کرے: وزیراعظم

وزیراعظم شہباز شریف نے ترکیہ کے شہر انطالیہ میں کوپ 31 (COP31) کے اعلیٰ سطح اجلاس سے خطاب کرتے ہوئے کہا ہے کہ موسمیاتی تبدیلی سے نمٹنے کے لیے محض وعدے نہیں بلکہ ٹھوس اقدامات کی ضرورت ہے، اور عالمی برادری ترقی پذیر ممالک سے کیے گئے مالیاتی و ماحولیاتی وعدے پورے کرے۔ انہوں نے کہا کہ پاکستان عالمی کاربن اخراج میں ایک فیصد سے بھی کم کا ذمہ دار ہونے کے باوجود موسمیاتی تبدیلی سے سب سے زیادہ متاثرہ ممالک میں شامل ہے، جہاں 2022ء کے تباہ کن سیلابوں نے ملک کا ایک تہائی حصہ ڈبو دیا اور 3 کروڑ 30 لاکھ افراد کو متاثر کرنے کے ساتھ بھاری معاشی نقصان پہنچایا۔ وزیراعظم نے مشکل وقت میں پاکستان کا ساتھ دینے اور کوپ 31 کے شاندار انتظامات پر ترک صدر اور عوام کا شکریہ بھی ادا کیا۔ قبل ازیں کلین انرجی کی جانب منتقلی سے متعلق اجلاس سے خطاب میں شہباز شریف نے بتایا کہ سولر توانائی کے فروغ سے پاکستان میں خاموشی سے شمسی انقلاب برپا ہوا ہے، ملک میں فروخت ہونے والی ہر 10 میں سے ایک موٹرسائیکل الیکٹرک ہے اور 2030ء تک نئی گاڑیوں میں الیکٹرک گاڑیوں کا تناسب 30 فیصد تک لے جانے کا ہدف مقرر ہے، تاہم مناسب فنانسنگ کے بغیر ان اہداف کا حصول ایک بڑا چیلنج ہے۔