پاکستان منرلز فورم: معدنیات کو خام شکل میں برآمد کرنا مقصد نہیں، اسحاق ڈار

نائب وزیراعظم اور وزیر خارجہ اسحاق ڈار نے ’پاکستان منرلز انویسٹمنٹ فورم 2026‘ سے خطاب کرتے ہوئے کہا ہے کہ معدنی شعبے میں دیرپا شراکت داری کے عزم پر عالمی سرمایہ کاروں کا اعتماد قابلِ تحسین ہے، اور پاکستان کا مقصد محض معدنیات نکال کر خام شکل میں برآمد کرنا نہیں بلکہ پوری معدنی ویلیو چین کو ترقی دینا ہے۔ انہوں نے کہا کہ مالیاتی نظم و ضبط اور اصلاحات کے نتیجے میں معاشی استحکام آیا ہے جبکہ معدنی وسائل کی ترقی معاشی تبدیلی کے اگلے مرحلے کا اہم حصہ ہے، جس کے تحت پراسیسنگ، ریفائننگ اور مصنوعات تیار کرنے کی صلاحیت کو بتدریج بڑھایا جائے گا۔ نائب وزیراعظم نے مزید کہا کہ بلوچستان پاکستان کے معدنی شعبے کا مستقبل ہے اور کلین انرجی و الیکٹرک گاڑیوں کے باعث تانبے سمیت دیگر معدنیات کی بڑھتی ہوئی عالمی طلب کو پورا کرنے کے لیے پاکستان مضبوط سپلائی چین کے قیام میں فعال کردار ادا کرنے کے لیے کوشاں ہے۔