چائلڈ سیفٹی پروٹوکول کیخلاف ورزی، میکسیکو کی عدالت نے میٹا پر 567 ملین ڈالرز کا جرمانہ عائد کردیا

امریکہ کی ریاست نیو میکسیکو کی ایک عدالت نے سوشل میڈیا جائنٹ میٹا (Meta) کو بچوں کو آن لائن لاحق خطرات سے آگاہ کرنے میں ناکامی اور ان کے عدم تحفظ پر مزید 567 ملین ڈالرز (تقریباً 56 کروڑ 70 لاکھ ڈالر) کا بھاری جرمانہ ادا کرنے کا حکم دیا ہے۔ یہ فیصلہ بچوں کے تحفظ اور آن لائن سیکیورٹی کے حوالے سے کسی بھی ٹیک کمپنی کے خلاف تاریخی اقدامات میں سے ایک ہے۔

اس کیس کی سماعت کرنے والے امریکی جج بریان نے اپنے فیصلے میں میٹا کو شدید تنقید کا نشانہ بناتے ہوئے اسے ایک “عوامی خطرہ اور پریشانی” قرار دیا اور کمپنی کا موازنہ ایک ایسی زہریلی فیکٹری سے کیا جس کی مصنوعات اشتہارات اور مواد ہیں، جبکہ بچوں کا نفسیاتی نقصان اور ان کا جنسی استحصال اس فیکٹری کی پھیلاؤ کردہ “آلودگی” ہے۔ جج نے حکم دیا کہ میٹا یہ تمام رقم ایک مخصوص فنڈ میں جمع کرائے جسے مستقبل میں بچوں کو آن لائن خطرات اور نقصانات سے بچانے کے لیے استعمال کیا جائے گا۔

واضح رہے کہ اس مقدمے میں میٹا کو اس سے قبل بھی جرمانے کا حکم دیا جا چکا ہے، جس کے بعد اس کیس میں میٹا پر عائد مجموعی جرمانے اور واجب الادا رقم کا حجم 942 ملین ڈالرز (تقریباً 94 کروڑ 20 لاکھ ڈالر) تک پہنچ گیا ہے۔ دوسری جانب میٹا کے ترجمان نے عدالتی فیصلے سے شدید اختلاف کا اظہار کرتے ہوئے اعلان کیا ہے کہ کمپنی اس فیصلے کے خلاف اعلیٰ عدالت میں اپیل دائر کرے گی۔