امریکا ایران تنازع کا واحد قابلِ عمل حل مذاکرات اور سفارت کاری ہے: چین

بیجنگ: چین نے امریکہ اور ایران کے درمیان جاری شدید سیاسی و معاشی کشیدگی کے خاتمے کے لیے مذاکرات اور سفارتی کوششوں کو واحد قابلِ عمل اور پائیدار راستہ قرار دیا ہے۔

چینی وزارتِ خارجہ کے ترجمان نے بیجنگ میں پریس بریفنگ کے دوران صحافیوں سے گفتگو کرتے ہوئے کہا کہ ایران کے معاملے پر تمام فریقین کے مابین باہمی مذاکرات ہی موجودہ بحران سے نکلنے کی کلید ہیں۔ چینی ترجمان نے واشنگٹن کی جانب سے ایران کے خلاف عائد کی جانے والی نئی معاشی پابندیوں پر ردِعمل دیتے ہوئے کہا کہ چین کسی بھی ملک کے خلاف غیر قانونی اور یکطرفہ پابندیوں کے استعمال کی سخت مخالفت کرتا ہے۔

ترجمان نے چین کے دیرینہ مؤقف کو دہراتے ہوئے کہا کہ خطے میں امن و استحکام کے قیام کے لیے چین کا موقف بالکل واضح اور مستقل ہے۔ انہوں نے امریکہ اور ایران سمیت تمام متعلقہ فریقوں سے اپیل کی کہ وہ کشیدگی اور تصادم کا راستہ چھوڑ کر سفارت کاری، بات چیت اور پرامن ذرائع سے تمام متنازع امور کا حل تلاش کریں۔