سائنس دانوں کی بڑی پیش رفت، سولر سیلز کی کارکردگی بنانے کا نیا طریقہ دریافت

یونیورسٹی آف کیلیفورنیا، سان ڈیاگو کے محققین کی زیرِ قیادت ایک بین الاقوامی سائنسی ٹیم نے شمسی توانائی کی ٹیکنالوجی میں ایک بڑی کامیابی حاصل کرتے ہوئے پیرووسکائٹ سولر سیلز (Perovskite Solar Cells) کو انتہائی مؤثر، پائیدار اور کم خرچ بنانے کا ایک نیا اور جدید طریقہ دریافت کر لیا ہے۔ معروف سائنسی جریدے ‘سائنس’ میں شائع ہونے والی اس تحقیق کے مطابق سائنسدانوں نے مواد کے کرسٹل بننے کے عمل (Crystal Formation) کے دوران عارضی طور پر ایک خاص مائع تخلیق کیا، جس کی مدد سے انتہائی بڑے، یکساں اور کم نقائص والے پیرووسکائٹ کرسٹل تیار کرنے میں کامیابی ملی۔

اس نئی ٹیکنالوجی سے تیار کردہ سولر سیلز اور روشنی خارج کرنے والے ڈائیوڈز (LEDs) کی کارکردگی 24 سے 26 فیصد تک ریکارڈ کی گئی ہے، جو اس فیلڈ میں ایک نمایاں سنگِ میل ہے۔ تجربات کے دوران ان سولر سیلز نے مصنوعی سورج کی روشنی میں مسلسل آٹھ ہفتے تک فعال رہنے کے باوجود اپنی ابتدائی کارکردگی کا بیشتر حصہ کامیابی سے برقرار رکھا۔ روایتی سلیکون سولر سیلز کے برعکس پیرووسکائٹ کو سستے کیمیائی محلول کی شکل میں تیار کر کے باریک تہوں کی صورت میں سطح پر لگایا جا سکتا ہے، جس سے نہ صرف مینوفیکچرنگ کا عمل انتہائی آسان ہو جاتا ہے بلکہ توانائی کی کھپت میں بھی نمایاں کمی آتی ہے۔