اقوام متحدہ میں سربراہ انسانی حقوق کا اسرائیل سے لبنان پر قبضہ ختم کرنے کا مطالبہ

اقوام متحدہ کے انسانی حقوق کے سربراہ وولکر ٹرک نے اپنا دورہِ لبنان مکمل کرنے کے بعد مطالبہ کیا ہے کہ اسرائیل جنوبی لبنان کے بڑے علاقوں پر اپنا قبضہ فوری طور پر ختم کرے اور شہری آبادی کے گھروں کی مسماری کو روکے۔ اپنے دورے کے دوران سرکاری حکام، سول سوسائٹی کے نمائندوں اور اسرائیلی حملوں سے بے گھر ہونے والے متاثرین سے ملاقاتوں کے بعد انہوں نے خبردار کیا کہ لبنان میں اسرائیل کے کچھ اقدامات جنگی جرائم کے مترادف ہو سکتے ہیں۔ وولکر ٹرک کا کہنا تھا کہ شہروں و دیہاتوں کی وسیع پیمانے پر تباہی اور درجنوں طبی کارکنوں اور صحافیوں کی ہلاکت نے عالمی برادری اور انسانی حقوق کی تنظیموں کی تشویش میں شدید اضافہ کر دیا ہے۔