اقوام متحدہ نے مصنوعی ذہانت انسانیت کیلئے خطرناک قرار دیدی

جنیوا: اقوامِ متحدہ کے ہائی کمشنر برائے انسانی حقوق وولکر ترک نے مصنوعی ذہانت (AI) کی تیز رفتار پیش رفت پر شدید تشویش کا اظہار کرتے ہوئے خبردار کیا ہے کہ یہ ٹیکنالوجی انسانوں کے وجود اور بنیادی حقوق کے لیے سنگین خطرہ بن سکتی ہے۔

جنیوا میں اقوامِ متحدہ کے اجلاس سے خطاب کرتے ہوئے وولکر ترک نے کہا کہ اس وقت دنیا بھر میں محض چند بااثر افراد اور اداروں کے پاس مصنوعی ذہانت پر تقریباً لامحدود طاقت مرکوز ہو چکی ہے۔ انہوں نے زور دیا کہ اس سے قبل کہ بہت دیر ہو جائے، عالمی برادری بالخصوص اے آئی ٹیکنالوجی کی تیاری اور سپلائی چین میں شامل ممالک کو ایسی مضبوط، واضح اور ناقابلِ سمجھوتہ قانونی و اخلاقی حدود متعین کرنی چاہئیں جن کی خلاف ورزی کسی صورت ممکن نہ ہو۔

یو این ہائی کمشنر نے مزید کہا کہ وہ مصنوعی ذہانت کے ماڈلز بنانے والی تمام عالمی ٹیکنالوجی کمپنیوں پر زور دیتے رہیں گے کہ وہ اس کے منفی اثرات اور خطرات کو کم سے کم کرنے کے لیے جوابدہی کا مؤثر نظام قائم کریں۔ ان کا کہنا تھا کہ جدید ترین اے آئی الگورتھمز اور آلات کی تیاری میں عالمی انسانی حقوق کے تحفظ اور اخلاقی ضوابط کی بالادستی کو ہر صورت یقینی بنانا ہو گا۔