دنیا میں ہر دسواں شخص انتہائی غریب، 2.3 ارب افراد بھوکے سوتے ہیں: اقوام متحدہ

نیویارک (عالمی میڈیا): اقوامِ متحدہ کی نائب سیکرٹری جنرل امینہ محمد نے انکشاف کیا ہے کہ دنیا بھر میں اب بھی ہر 10 میں سے ایک شخص انتہائی غربت کی زندگی گزار رہا ہے اور 2.3 ارب افراد روزانہ رات کو بھوکے سوتے ہیں۔ اقتصادی و سماجی کونسل (ECOSOC) کے اعلیٰ سطح کے اجلاس سے خطاب کرتے ہوئے انہوں نے پائیدار ترقیاتی اہداف (SDGs) پر تشویش کا اظہار کیا اور بتایا کہ جغرافیائی سیاسی کشیدگی، معاشی غیر یقینی، موسمیاتی تبدیلی اور قرضوں کے بحران جیسے باہم جڑے مسائل نے ترقی کی رفتار کو سست کر دیا ہے۔ ان کا کہنا تھا کہ اگرچہ بجلی اور انٹرنیٹ کی رسائی میں عالمی سطح پر نمایاں بہتری آئی ہے، لیکن ممالک کے درمیان پیش رفت میں واضح فرق موجود ہے۔ امینہ محمد نے عالمی برادری پر کثیرالجہتی تعاون کو مضبوط بنانے اور سرمایہ کاری میں اضافے پر زور دیتے ہوئے کہا کہ 2027 کا ایس ڈی جی سربراہی اجلاس محض ایک جائزہ نہیں بلکہ 2030 تک کے اہداف کے حصول کے لیے نئے سیاسی عزم اور عملی اقدامات کا مظہر ہونا چاہیے۔