آل پاکستان گڈز ٹرانسپورٹ اتحاد کا ملک گیر غیر معینہ مدت ہڑتال کا آغاز

وفاقی اور سندھ حکومت کے ساتھ مذاکرات ناکام ہونے کے بعد آل پاکستان گڈز ٹرانسپورٹ اتحاد نے ملک بھر میں غیر معینہ مدت کے لیے ہڑتال کا باضابطہ آغاز کر دیا ہے، جس کے نتیجے میں گڈز ٹرانسپورٹرز نے مختلف شاہراہوں اور مقامات پر سامان بردار گاڑیاں کھڑی کر کے سپلائی چین معطل کر دی ہے۔

آل پاکستان گڈز ٹرانسپورٹرز اتحاد کے رہنما ملک شہزاد اعوان نے میڈیا سے گفتگو کرتے ہوئے کہا کہ وفاقی اور صوبائی حکومتیں ان کے مسائل کے حل میں بالکل سنجیدہ نہیں ہیں۔ انہوں نے واضح کیا کہ ٹرانسپورٹرز نے حکومت کے سامنے 12 نکاتی چارٹر آف ڈیمانڈ پیش کیا ہے اور مطالبہ کیا ہے کہ حکومت دسمبر 2025ء کی ہڑتال کے دوران کیے گئے تمام وعدوں پر فوری عمل درآمد یقینی بنائے۔ ملک شہزاد اعوان کا مزید کہنا تھا کہ 3 اگست کو پریس کانفرنس کے ذریعے ہڑتال کا حتمی اعلان کیا گیا تھا، اور جب تک مطالبات منظور نہیں ہوتے، ملک گیر ہڑتال جاری رہے گی۔