مریم نواز کا صفائی نظام میں سخت مانیٹرنگ کا حکم، مزید بہتر بنانے کا ہدف

وزیراعلیٰ پنجاب مریم نواز شریف نے ‘ستھرا پنجاب پروگرام’ کو صوبے بھر میں مزید مؤثر اور فعال بنانے کے لیے صفائی کے نظام میں بہتری، ورکرز کو ہر ماہ کی 5 تاریخ تک بروقت تنخواہوں کی ادائیگی اور فیلڈ مانیٹرنگ سخت کرنے کی کڑی ہدایات جاری کر دی ہیں۔

لاہور میں وزیراعلیٰ کی زیرِ صدارت ستھرا پنجاب پروگرام کی کارکردگی کا خصوصی جائزہ اجلاس منعقد ہوا۔ اجلاس کے دوران مریم نواز شریف نے مارکیٹوں اور کمرشل علاقوں میں یکساں طرز کے ڈسٹ بن اور گاربیج بیگز استعمال کرنے کا حکم دیا اور صفائی ورکرز کو صبح 5 بجے مرکزی سڑکوں کی دھلائی اور صفائی یقینی بنانے کی ہدایت کی۔ انہوں نے ڈور ٹو ڈور ویسٹ کلیکشن کے نظام کو بہتر بنانے، خالی پلاٹوں، سبزی منڈیوں، ریلوے ٹریکس، گرین بیلٹس، سکولوں اور ہسپتالوں کے گرد و نواح کی باقاعدگی سے صفائی کا حکم دیا۔

وزیراعلیٰ نے صفائی ورکرز کے حقوق پر زور دیتے ہوئے کہا کہ ورکرز کو ہر ماہ کی 5 تاریخ تک تنخواہوں کی ادائیگی ہر صورت یقینی بنائی جائے اور تاخیر پر سخت ایکشن لیا جائے۔ انہوں نے صوبہ بھر میں اے ڈی سی (ADC) سوشل سروسز کو صفائی کی مانیٹرنگ کی ذمہ داری سونپتے ہوئے کام نہ کرنے والے افسران و کنٹریکٹرز کے لیے زیادہ سے زیادہ زیرو ٹالرنس پالیسی اپنانے کا اعلان کیا۔ اجلاس میں لاہور، خانیوال، اوکاڑہ، اٹک، قصور اور مری کی بہتر کارکردگی کو سراہا گیا جبکہ فیصل آباد، سیالکوٹ اور شیخوپورہ کو کارکردگی سدھارنے کی ہدایت کی گئی۔ وزیراعلیٰ نے احکامات پر عملدرآمد کا جائزہ لینے کے لیے 7 دن بعد دوبارہ اجلاس طلب کر لیا ہے۔