امریکا ایران کشیدگی کم کرنے میں پاکستان کا ثالثی کردار اہم رہا:ساؤتھ ایشین وائسز

معروف دفاعی و تجزیاتی پلیٹ فارم ساؤتھ ایشین وائسز (SAV) نے اعتراف کیا ہے کہ امریکا اور ایران کے درمیان شدید ترین کشیدگی کم کرنے اور دونوں ممالک کو مذاکرات کی میز پر لانے میں پاکستان نے ایک تاریخی اور کلیدی ثالث کا کردار ادا کیا ہے۔

ایس وی سی کی شائع کردہ خصوصی تجزیاتی رپورٹ کے مطابق دونوں ممالک کے اعلیٰ حکام کے درمیان پاکستان کے دارالحکومت اسلام آباد میں براہِ راست مذاکرات منعقد ہوئے، جسے 1979ء کے بعد سے اب تک واشنگٹن اور تہران کے درمیان اعلیٰ ترین سطح کا براہِ راست رابطہ قرار دیا جا رہا ہے۔ رپورٹ میں انکشاف کیا گیا کہ اسلام آباد میں امریکی اور ایرانی نمائندوں کے درمیان 20 گھنٹے سے زائد طویل مذاکرات ہوئے، جس کے نتیجے میں دونوں ممالک نے جنگ بندی کا اعلان کیا اور براہِ راست سفارتی راستے کھل گئے۔

تجزیے میں پاکستان کے اس جرات مندانہ اور غیر جانبدارانہ کردار کو 1971ء میں امریکی وزیر خارجہ ہنری کسنجر کے خفیہ دورۂ چین میں پاکستان کے تاریخی کردار کے ہم پلہ قرار دیا گیا ہے۔ رپورٹ میں واضح کیا گیا کہ چین، فرانس، جرمنی، بھارت اور برطانیہ جیسی عالمی طاقتیں بھی ایسا سفارتی کردار ادا کرنے میں ناکام رہیں۔ ساؤتھ ایشین وائسز نے پاکستان کو ایک ایسی اہم درمیانی طاقت (Middle Power) قرار دیا ہے جو اپنی جغرافیائی اہمیت، سفارتی صلاحیت اور تمام فریقین کے اعتماد کی بدولت بین الاقوامی تنازعات کے حل کی صلاحیت رکھتی ہے۔