حج 2027: پرائیویٹ حج آپریشن کیلئے نیا ڈیجیٹل نظام نافذ کرنے کا فیصلہ

وزارتِ مذہبی امور و بین المذاہب ہم آہنگی نے حج 2027 کے لیے سعودی عرب کے ‘نسک مسار’ سسٹم کی طرز پر پرائیویٹ حج آپریشن کے لیے ایک نیا اور جدید ڈیجیٹل نظام نافذ کرنے کا فیصلہ کر لیا ہے۔

ذرائع کے مطابق اس نئے نظام کے تحت آئندہ حج کے لیے پرائیویٹ حج کی بکنگ براہِ راست پرائیویٹ ٹور آپریٹرز کے پاس ہونے کے بجائے وزارتِ مذہبی امور کے توسط سے کی جائے گی۔ تاریخ میں پہلی بار سرکاری حج سکیم کے ساتھ ساتھ پرائیویٹ حج آپریشن کو بھی وزارتِ مذہبی امور کی براہِ راست اور مکمل نگرانی میں چلانے کا فیصلہ کیا گیا ہے۔

ذرائع نے مزید بتایا ہے کہ پرائیویٹ حج سکیم کو وزارتِ مذہبی امور کی آفیشل ’پاک حج ایپ‘ کے ذریعے یکجا کیا جائے گا، جس کے تحت تمام تر حج بکنگز اور دیگر انتظامی امور ڈیجیٹل سسٹم سے منظم ہوں گے۔ اس جدید اقدام کا بنیادی مقصد پرائیویٹ حج آپریشنز میں شفافیت لانا، آپریٹرز کی بہتر مانیٹرنگ کرنا اور عازمینِ حج کو معیاری سہولیات کی فراہمی یقینی بنانا ہے۔