ایم آئی 5 کو صحافی کا غیرقانونی طور پر ڈیٹا لینے پر معاوضہ ادا کرنے کا حکم

برطانیہ کے ‘انوسٹی گیٹری پاورز ٹربیونل’ (IPT) نے ایک اہم ترین فیصلے میں برطانوی اندرونی استخباراتی ایجنسی ایم آئی 5 (MI5) اور شمالی آئرلینڈ کی پولیس سروس (PSNI) کو بی بی سی کے سابق سینئر صحافی ونسنٹ کیرنی (Vincent Kearney) کو غیر قانونی طور پر فون کا ڈیٹا حاصل کرنے پر ہرجانہ ادا کرنے اور معافی مانگنے کا حکم دیا ہے۔

ٹربیونل نے اپنے فیصلے میں واضح کیا کہ صحافی کے فون ریکارڈز اور خفیہ معلومات تک رسائی رازداری کے بنیادی حقوق اور صحافتی ذرائع (Journalistic Sources) میں ایک غیر متناسب اور نا روا مداخلت تھی۔ ونسنٹ کیرنی، جو اس وقت آئرش براڈکاسٹر ‘آر ٹی ای’ (RTE) کے ساتھ وابستہ ہیں، کو MI5 اور PSNI کی جانب سے الگ الگ 10,000 برطانوی پاؤنڈز (تقریباً 13,326 امریکی ڈالر) بطورِ ہرجانہ و معاوضہ ادا کرنے کی ہدایت کی گئی ہے۔

اس فیصلے کے فوری بعد PSNI کے چیف کانسٹیبل جون باؤچر (Jon Boutcher) نے ٹربیونل کے فیصلے کو تسلیم کرتے ہوئے ونسنٹ کیرنی سے باضابطہ معافی مانگ لی اور یقین دہانی کروائی کہ مستقبل میں اس قسم کے واقعات کی روک تھام کے لیے پولیس کی پالیسیوں اور طریقۂ کار میں اہم تبدیلیاں کی جا چکی ہیں۔