امریکی ایوان نمائندگان میں ایران کیخلاف جنگ روکنے کی قرارداد پھر منظور

امریکی ایوانِ نمائندگان (US House of Representatives) نے صدر ڈونلڈ ٹرمپ کے اقدامات کے خلاف ایک اہم سیاسی تحرک سامنے لاتے ہوئے ایران کے خلاف بلا اجازت عسکری کارروائیوں اور جنگ کو فوری طور پر روکنے سے متعلق قرارداد منظور کر لی ہے۔ امریکی میڈیا کے مطابق 208 کے مقابلے میں 214 ووٹوں سے منظور ہونے والی یہ قرارداد دراصل صدر ٹرمپ کے لیے کانگریس کی جانب سے واضح اور سخت وارننگ تصور کی جا رہی ہے۔

4 ریپبلکن ارکان نے اپنی ہی پارٹی کے موقف سے ہٹ کر اس قرارداد کی حمایت میں ڈیموکریٹس کو ووٹ دیا۔ تاہم، ریپبلکنز کی اکثریت نے صدر ٹرمپ کے جنگی اختیارات کے حق میں رائے دہی کی۔ فلور پر قرارداد کی قیادت کرنے والی ڈیموکریٹ رکن پرامیلا جے پال (Pramila Jayapal) نے کہا کہ ایران کے خلاف اس عسکری اقدام کا “کوئی واضح مشن، کوئی حکمت عملی اور نہ ہی کوئی حتمی ہدف سامنے آیا ہے”۔

• دوسری جانب صدر ڈونلڈ ٹرمپ نے اپنے دفاع میں اصرار کیا ہے کہ ایران پر امریکی عسکری حملوں کا مطلب کسی نئی طویل مدتی جنگ کی طرف جانا ہرگز نہیں ہے۔ واضح رہے کہ ایوانِ نمائندگان سے منظوری کے بعد اسی نوعیت کی قرارداد پر امریکی سینیٹ میں بھی رائے شماری کی جا رہی ہے۔