سعودی توانائی معاہدہ ابراہیمی معاہدوں سے مشروط، وائٹ ہاؤس نے ٹرمپ کا مؤقف دہرا دیا

وائٹ ہاؤس کی پریس سیکرٹری کیرولین لیویٹ (Karoline Leavitt) نے واشنگٹن میں میڈیا بریفنگ کے دوران واضح کیا ہے کہ امریکا اور سعودی عرب کے درمیان مجوزہ توانائی اور سول جوہری تعاون کا معاہدہ حتمی طور پر سعودی عرب کے ابراہیمی معاہدوں (Abraham Accords) میں شامل ہونے سے مشروط ہے۔

ترجمان کے مطابق، امریکی صدر ڈونلڈ ٹرمپ کی ابھی تک سعودی اعلیٰ قیادت سے اس مجوزہ سول جوہری معاہدے کی تفصیلی شرائط پر براہِ راست گفتگو نہیں ہوئی، تاہم واشنگٹن انتظامیہ ریاض کے ساتھ مذاکرات کا سلسلہ جاری رکھے گی۔ کیرولین لیویٹ نے بتایا کہ صدر ٹرمپ شروع ہی سے سعودی عرب کو اسرائیل کے ساتھ تعلقات معمول پر لانے کے ابراہیمی معاہدے کا حصہ بنانے کی خواہش رکھتے ہیں۔

ایک سوال کے جواب میں وائٹ ہاؤس کی ترجمان نے یہ بھی انکشاف کیا کہ صدر ڈونلڈ ٹرمپ اور چینی صدر شی جن پنگ کے درمیان ہونے والی متوقع ملاقات میں مصنوعی ذہانت (AI) ٹیکنالوجی کی مبینہ چوری اور کاپی رائٹس کے تحفظ کا معاملہ بھی ایجنڈے پر لائے جانے کا امکان ہے۔ ترجمان نے اعادہ کیا کہ دونوں ملکوں کے درمیان سول نیوکلیئر ڈیل اور توانائی تعاون کی شرائط پوری ہونے کے بعد ہی کسی حتمی معاہدے پر دستخط ہوں گے۔