روس مذاکرات کے لیے تیار، یوکرین میں فوجی آپریشن جاری رہے گا: کریملن

کریملن کے ترجمان دیمتری پیسکوف نے واشگاف الفاظ میں کہا ہے کہ روس یوکرین تنازع کے سیاسی حل اور مذاکرات کے لیے مکمل طور پر تیار ہے، تاہم یورپی ممالک کی جانب سے کیف حکومت کو عسکری امداد کی فراہمی اور جنگ جاری رکھنے کی مسلسل ترغیب کے باعث ماسکو اپنا ‘خصوصی فوجی آپریشن’ جاری رکھنے پر مجبور ہے۔ انہوں نے دعویٰ کیا کہ میدانِ جنگ میں روسی افواج کی پیش رفت حوصلہ افزا اور مثبت ہے۔

روزانہ کی بریفنگ کے دوران دیمتری پیسکوف نے روس اور امریکا کے تعلقات اور جوہری پالیسی سے متعلق اہم نکات پیش کیے انہوں نے تصدیق کی کہ واشنگٹن اور ماسکو کے درمیان ورکنگ چینلز کے ذریعے رابطے قائم ہیں اور روس کو توقع ہے کہ امریکی مذاکرات کار جلد ماسکو کا دورہ کریں گے تاکہ براہِ راست بات چیت بحال ہو سکے۔ کریملن ترجمان نے واضح کیا کہ روس جوہری ہتھیاروں کے عدم پھیلاؤ (Non-Proliferation) کے بنیادی اصول پر قائم ہے۔  انہوں نے زور دیا کہ ایران، سعودی عرب اور دیگر تمام ممالک کو پرامن مقاصد کے لیے جوہری توانائی کے استعمال کا پورا حق حاصل ہے اور اس حق کی عالمی سطح پر ضمانت دی جانی چاہیے۔