اسحاق ڈار ایس سی او وزرائے خارجہ اجلاس کیلئے کرغزستان پہنچ گئے

پاکستان کے نائب وزیراعظم اور وزیرِ خارجہ سینیٹر محمد اسحاق ڈار شنگھائی تعاون تنظیم (SCO) کی کونسل آف فارن منسٹرز (CFM) کے دو روزہ اہم اجلاس میں پاکستان کی نمائندگی کے لیے کرغزستان کے ساحلی شہر چولپون آتا (Cholpon-Ata) پہنچ گئے ہیں۔ چولپون آتا کے ہوائی اڈے پر کرغزستان کے نائب وزیرِ خارجہ کیرات تورسنکولوف، کرغزستان میں پاکستان کے سفیر التمش وزیر اور ایس سی او کے لیے پاکستان کے قومی رابطہ کار ڈاکٹر محمد فیصل نے نائب وزیراعظم کا استقبال کیا۔

دفترِ خارجہ کے ترجمان کے مطابق، نائب وزیراعظم ایس سی او کے رکن ممالک کے وزرائے خارجہ کے اعزاز میں دیے جانے والے غیر رسمی عشائیے میں شرکت کریں گے اور باہمی دلچسپی کے علاقائی و عالمی امور پر تبادلہ خیال کریں گے۔ دورے کے دوران اسحاق ڈار کرغز جمہوریہ کے صدر سے ملاقات اور چین، روس، ایران سمیت دیگر رکن ممالک کے ہم منصبوں کے ساتھ دوطرفہ سائیڈ لائن ملاقاتیں کریں گے۔ ان ملاقاتوں میں سلامتی، معاشی تعاّون، علاقائی کنیکٹیویٹی اور وزرائے خارجہ کونسل کے مرکزی اجلاس کے ایجنڈے کو حتمی شکل دینے پر تفصیلی بات چیت کی جائے گی۔